Teknologjia po kthehet në një nga mjetet kryesore të Policisë së Shtetit për kontrollin e trafikut dhe rritjen e sigurisë rrugore në vend.
Ministri i Brendshëm, Besfort Lamallari, deklaroi se policia po mbështetet gjithnjë e më shumë te pajisjet elektronike për monitorimin e rrugëve dhe evidentimin në kohë reale të shkeljeve.
Sipas tij, radarët e gjeneratës së re, dronët vëzhgues dhe automjetet inteligjente po përdoren për identifikimin e tejkalimit të shpejtësisë dhe shkeljeve të tjera që rrezikojnë sigurinë e drejtuesve dhe udhëtarëve.
Lamallari theksoi se hapi më i rëndësishëm në këtë drejtim do të jetë shtrirja e plotë e infrastrukturës teknologjike digjitale në qytetet kryesore të vendit.
“Me zbatimin e projektit Smart City do të bëjmë një kapërcim epokal për sigurinë rrugore dhe atë publike në tërësi në Shqipëri”, u shpreh ministri i Brendshëm.
Sipas tij, digjitalizimi do të mundësojë një monitorim më të gjerë jo vetëm të akseve rrugore, por edhe të hapësirave publike, duke i dhënë policisë më shumë mundësi për të reaguar në kohë ndaj shkeljeve dhe ngjarjeve që cenojnë rendin dhe sigurinë.
