Procesi i votimit për diasporën, për të cilin janë shpenzuar rreth 9.2 milionë euro, po përballet me sfida serioze logjistike që rrezikojnë të minojnë gjithë përpjekjen.
Nga 218,638 zarfe të dërguara nga Komisioni Qendror i Zgjedhjeve (KQZ) për shqiptarët jashtë vendit, deri tani vetëm 111,557 kanë mbërritur në Shqipëri.
Ndërkohë, rreth 25 mijë qytetarë nuk i kanë marrë ende fare zarfet e tyre, edhe pse dërgimi është mbyllur nga ana e KQZ.
Mbi 100 mijë zarfe mbeten ende të pakthyera dhe fati i tyre është i pasigurt.
KQZ nuk ka dhënë asnjë sqarim se çfarë masash do të merren për të garantuar kthimin e tyre brenda afatit ligjor.
Kjo situatë rrezikon të përjashtojë një numër të madh votuesish nga diaspora, duke nxjerrë në pah problemet logjistike dhe burokratike të procesit.
Projektuar si një hap historik për përfshirjen e shqiptarëve jashtë vendit në jetën politike të vendit, procesi i votës së diasporës tani përballet me kritika të ashpra për organizimin dhe menaxhimin e tij.
Vonesat, mungesa e qartësisë dhe mosarritja e një pjese të madhe të zarfeve mund të dëmtojnë rëndë besimin e qytetarëve në integritetin e këtij procesi./skyweb.al
