Kompania britanike JCB, e njohur në mbarë botën për prodhimin e makinerive të rënda, ka vendosur një rekord të ri botëror të shpejtësisë për automjetet me hidrogjen. Mjeti eksperimental Hydromax arriti shpejtësinë mbresëlënëse prej 653,9 km/h në pistën e kripur të Bonneville, në Utah të SHBA-së.
Rekordi u vendos nga piloti dhe drejtuesi i projektit, Andy Green, i cili drejtoi automjetin 10 metra të gjatë. Hydromax furnizohet nga dy motorë me djegie të brendshme që përdorin hidrogjen dhe prodhojnë së bashku rreth 1,600 kuaj fuqi.
Ky rezultat është pjesë e investimit prej rreth 100 milionë paundësh të JCB-së në teknologjinë e hidrogjenit. Kompania e konsideron këtë teknologji një alternativë të përshtatshme për makineritë e rënda, të cilat kërkojnë fuqi të madhe dhe furnizim të shpejtë me energji.
Ndryshe nga motorët tradicionalë me naftë, përdorimi i hidrogjenit në këtë teknologji synon të reduktojë ndjeshëm emetimet, duke prodhuar kryesisht avull uji gjatë procesit të djegies.
Andy Green është gjithashtu mbajtës i rekordit absolut botëror të shpejtësisë tokësore. Në vitin 1997, ai arriti mbi 1,227 km/h me automjetin e fuqizuar nga motorë reaktivë. Me rekordin e ri të Hydromax, Green forcon edhe më tej emrin e tij në historinë e rekordeve të shpejtësisë. /Skyweb.al
