nga Skyweb.al
Kriza e qirave në Tiranë është kthyer në një nga problemet më të mëdha për familjet dhe të rinjtë që kërkojnë një banesë në kryeqytet. Çmimet në zonat qendrore janë rritur ndjeshëm, ndërsa apartamentet pranë stadiumit “Air Albania” renditen ndër më të shtrenjtat në treg.
Por ish drejtoresha e AKSHI-t, Mirlinda Karçanaj, mund të ketë një formulë që do t’u vlente shumë qytetarëve të Tiranës.
Karçanaj, e cila është nën hetim nga SPAK në dosjen e AKSHI-t dhe dyshohet si pjesë e një grupi të strukturuar kriminal që kishte kontrollin e tenderëve milionësh në këtë institucion, ka deklaruar më herët në media se jetonte me qira pranë zonës së stadiumit “Air Albania” për të qenë afër punës.
Sipas saj, banesa ishte marrë me qira për shkak të nevojës që ajo të shkonte shpejt në AKSHI në rast krizash apo problematikash në institucion.
Por apartamenti për të cilin bëhet fjalë nuk është një banesë e zakonshme. Sipas SPAK, bëhet fjalë për një penthouse rreth 200 metra katrorë, në një nga pallatet luksoze të zonës, për të cilin Karçanaj paguante 600 euro në muaj.
Skyweb.al verifikoi çmimet e qirave në të njëjtën zonë dhe konstatoi se për apartamente më të vogla, qiratë lëvizin nga 2,000 deri në 3,500 euro në muaj. Në këtë krahasim, kontrata e deklaruar nga Karçanaj del shumë më e ulët se çmimet e tregut.
Nëse kjo kontratë do të merrej si model real negocimi, atëherë ish drejtoresha e AKSHI-t do të ishte ndoshta rasti më i suksesshëm në Tiranë për uljen e çmimit të qirasë në një zonë luksoze.
Me një apartament penthouse pranë stadiumit dhe me qira disa herë më të ulët se tregu, përvoja e saj do të ishte me interes për mijëra familje që nuk arrijnë të përballojnë çmimet aktuale.
Por SPAK nuk e beson këtë version.
Prokuroria e Posaçme ka sekuestruar apartamentin, bashkë me shumë prona të tjera të Karçanajt, pasi dyshon se kontrata e qirasë është fiktive dhe se pasuria mund të jetë përfituar në mënyrë korruptive. Sipas hetimeve, pronari i apartamentit rezulton të jetë mik dhe ortak i Ergys Agasit, një tjetër personazh i dosjes së AKSHI-t.
Në dosje janë përfshirë edhe deklarime të vartësve të Karçanajt, të cilët kanë pretenduar se ish drejtoresha merrte kuti vere të mbushura me euro, në shuma që sipas tyre shkonin deri në 200 mijë euro.
Për këto dyshime, hetimi i takon SPAK-ut. Por ndërkohë, rasti i apartamentit të Karçanajt mbetet një shembull i pazakontë për tregun e qirave në Tiranë.
Në një qytet ku një apartament i zakonshëm në qendër është bërë i papërballueshëm për shumë familje, një penthouse 200 metra katrorë pranë “Air Albania” me 600 euro në muaj tingëllon më shumë si mrekulli tregu sesa si kontratë normale qiraje. /skyweb.al
