Byroja Kombëtare e Hetimit ka hapur zyrtarisht procedurën për rekrutimin e 40 hetuesve të rinj, ndërsa kandidatët e interesuar kanë afat deri më 14 shtator 2026, ora 16:00, për të dorëzuar dokumentacionin.
Sipas njoftimit, mund të aplikojnë shtetas shqiptarë që kanë përfunduar arsimin e lartë policor, drejtësi, kontabilitet ose degë të tjera që lidhen me misionin e BKH-së.
Një tjetër kusht është që kandidatët të kenë më shumë se një vit përvojë pune në institucionet e zbatimit të ligjit ose në fusha të lidhura me veprimtarinë e Byrosë Kombëtare të Hetimit.
Kandidatët duhet gjithashtu të plotësojnë kriteret që lidhen me integritetin, sigurinë, pasurinë dhe figurën.
Procesi i konkurrimit do të zhvillohet në disa faza dhe përfshin testin konjitiv, testimin e sjelljes dhe arsyetimit logjik, testin e aftësive fizike, një test të zgjeruar me shkrim dhe intervistën e strukturuar.
Pjesë e detyrueshme e procedurës janë edhe testi i poligrafit, verifikimi i pasurisë, figurës dhe sigurisë, si dhe kontrolli mjekësor dhe psikologjik. Këto faza nuk pikëzohen, por duhet të kalohen nga kandidatët.
Dokumentacioni mund të dërgohet elektronikisht në adresën bkh.aplikim@spak.gov.al, ndërsa të njëjtat dokumente duhet të dërgohen edhe me postë në adresën e Byrosë Kombëtare të Hetimit, në rrugën “Jordan Misja”, nr. 1, Tiranë.
Me këtë thirrje, BKH synon të zgjerojë numrin e hetuesve që punojnë në strukturën e posaçme të hetimit, e cila vepron në mbështetje të SPAK-ut.
