Ministri grek i Mbrojtjes, Nikos Dendias, ka prezantuar një doktrinë të re për Forcat e Armatosura të Greqisë, duke theksuar se ndryshimet e thella në mjedisin gjeopolitik global kërkojnë përshtatje të menjëhershme. Ai theksoi se vendi gjendet në një rajon të pasigurt, të rrethuar nga konflikte dhe sfida teknologjike, dhe se sfidat kryesore të sigurisë nuk vijnë nga jashtë aleancave, por nga brenda NATO-s, duke iu referuar Turqisë.
Sipas tij, Athina duhet të zhvillojë një ekosistem modern mbrojtjeje, i aftë të prodhojë teknologji të avancuar dhe t’i sigurojë vendit avantazh strategjik në vitet e ardhshme.
Doktrina e re detare: Egjeu i mbrojtur nga toka
Një element kryesor i strategjisë së re është ndryshimi i rolit të Flotës Detare në Egje. Dendias u shpreh se mjedisi i ngushtë detar dhe rritja e përdorimit të dronëve e bëjnë të nevojshme një qasje më tokësore. Ai paralajmëroi se edhe anijet më të sofistikuara, si fregatat moderne, mund të neutralizohen lehtësisht me mjete shumë më të lira.
Për këtë arsye, mbrojtja e Egjeut pritet të bazohet kryesisht në artileri raketore të shpërndarë në ishujt e Arkipelagut. Krijimi i qindra apo mijëra pozicioneve tokësore do të mundësojë mbylljen e zonës detare nga toka, ndërsa Flota Detare do të ketë më shumë liri veprimi në Mesdheun e gjerë.
Dendias konfirmoi gjithashtu se fregatat e reja franceze dhe italiane do të pajisen me raketa me rreze veprimi mbi 1.500 kilometra, duke forcuar ndjeshëm kapacitetin parandalues të Greqisë në Mesdheun Lindor.
Forca ajrore dhe koncepti “Mburoja e Akilit”
Në analizën e tij mbi luftën moderne, ministri theksoi se mbrojtja ajrore nuk mund të mbështetet më vetëm te avionët luftarakë. Shembujt nga konfliktet në Lindjen e Mesme dhe në Ukrainë tregojnë se sistemet tokësore kundërajrore janë faktori kryesor që kufizon veprimtarinë e avionëve të armikut.
Në këtë kuadër, Greqia po përgatit një strategji të re të quajtur “Mburoja e Akilit”, e cila synon të krijojë një sistem të integruar mbrojtjeje tokë-det-ajër. Ky sistem do të kombinojë bateri raketore, teknologji të avancuara anti-dronë dhe komponentë të tjerë të mbrojtjes moderne, me qëllim rritjen e sigurisë kombëtare dhe rritjen e aftësive parandaluese të vendit.
/Skyweb.al
