Konsumi i energjisë elektrike në Shqipëri ka shënuar një rekord të ri gjatë sezonit veror, duke arritur në 27,809 MWh më 12 gusht 2026, sipas të dhënave të bëra publike nga ministri i Infrastrukturës dhe Energjisë, Enea Karakaçi.
Niveli i konsumit i regjistruar më 12 gusht rezulton rreth 5% më i lartë se rekordi i mëparshëm, i shënuar më 13 gusht 2025.
Rritja është edhe më e fortë nëse krahasohet konsumi mesatar i fillimit të gushtit me të njëjtën periudhë të vitit të kaluar.
Gjatë periudhës 1-12 gusht 2026, konsumi mesatar ditor arriti në 25,787 MWh, rreth 22% më shumë se mesatarja e gushtit 2025.
Edhe korriku regjistroi nivele shumë të larta të kërkesës, me një kulm prej 26,488 MWh, ndërsa gushti e çoi rekordin më tej në 27,809 MWh.
Rritja e fortë e konsumit lidhet me temperaturat e larta dhe përdorimin intensiv të pajisjeve të ftohjes, duke shtuar ndjeshëm ngarkesën mbi rrjetin energjetik.
Situata është bërë më e vështirë edhe nga zjarret pranë nënstacioneve dhe linjave të transmetimit, të cilat kanë shtuar presionin mbi sistemin në një periudhë kur kërkesa për energji ndodhet në nivele rekord.
Përballë kësaj situate, ekipet e Operatorit të Sistemit të Transmetimit dhe Operatorit të Sistemit të Shpërndarjes po vijojnë punën për të garantuar sigurinë e rrjetit dhe vijimësinë e furnizimit me energji elektrike.
