Drejtoria e Përgjithshme e Shërbimeve të Transportit Rrugor (DPSHTRR) njofton se qytetarët mund të rezervojnë online sportelin dhe shërbimin që u nevojitet, duke shmangur pritjet dhe radhët pranë drejtorive të transportit rrugor.
Sipas DPSHTRR-së, rezervimi kryhet përmes faqes zyrtare www.dpshtrr.al, duke zgjedhur seksionin “Shërbime Online” dhe më pas opsionin “Rezervo Shërbimin”.
Gjatë procedurës, qytetari mund të zgjedhë sportelin dhe shërbimin që i nevojitet, si dhe të caktojë datën dhe orarin më të përshtatshëm për paraqitjen pranë DPSHTRR-së.
Në fund duhet të plotësohen të dhënat e kërkuara për të përfunduar rezervimin.
DPSHTRR u bën thirrje qytetarëve të përdorin sistemin online për të planifikuar paraprakisht vizitat dhe për t’u shërbyer në orarin e rezervuar, pa qenë nevoja të presin në radhë.
