Të ardhurat nga kontributet e sigurimeve shoqërore dhe shëndetësore kanë vijuar rritjen gjatë vitit 2026, duke arritur një nivel të ri të lartë në muajin korrik.
Sipas të dhënave të Drejtorisë së Përgjithshme të Tatimeve, vetëm gjatë korrikut në buxhet janë mbledhur rreth 17.9 miliardë lekë, ekuivalente me afro 179 milionë euro.
Krahasuar me të njëjtin muaj të vitit 2025, arkëtimet janë shtuar me rreth 2.1 miliardë lekë, ose 13.1%. Ky është një nga nivelet më të larta të regjistruara për kontributet gjatë dekadës së fundit.
Ecuria pozitive është edhe më e dukshme nëse shihet periudha janar-korrik. Në shtatë muajt e parë të vitit, të ardhurat nga kontributet arritën në 111.8 miliardë lekë, nga rreth 100 miliardë lekë që ishin në të njëjtën periudhë të një viti më parë.
Kjo përkthehet në rreth 11.8 miliardë lekë më shumë të mbledhura brenda një viti nga pagesat e sigurimeve të të punësuarve në sektorin publik dhe privat, si dhe kategorive të vetëpunësuara.
Në rritjen e arkëtimeve kanë ndikuar disa zhvillime të njëkohshme në tregun e punës. Një prej tyre është rritja e pagave, fillimisht në sektorin publik dhe më pas edhe në sektorin privat. Me rritjen e pagës së deklaruar, rritet automatikisht edhe shuma që derdhet për sigurimet shoqërore dhe shëndetësore.
Efekt ka dhënë gjithashtu rritja e pagës minimale në 50 mijë lekë, në fuqi prej janarit të këtij viti. Ndryshimi ka zgjeruar bazën minimale mbi të cilën llogariten kontributet për një pjesë të të punësuarve.
Një tjetër element është aksioni kundër informalitetit, veçanërisht kontrollet ndaj nëndeklarimit të pagave. Formalizimi i pagave që më parë deklaroheshin nën nivelin real ka sjellë rritje të detyrimeve të paguara për sigurimet.
Në të njëjtën linjë është edhe përdorimi i pagave referencë në sektorë si ndërtimi, turizmi dhe mjekësia, ku administrata tatimore ka synuar të kufizojë deklarimin e pagave në nivele më të ulëta se ato reale.
Në performancën e të ardhurave kanë ndikuar gjithashtu shtimi i numrit të bizneseve dhe punonjësve të regjistruar, si dhe administrimi i detyrimeve nga strukturat tatimore.
Aktualisht, kontributi minimal mujor për sigurimet shoqërore dhe shëndetësore për një individ llogaritet në rreth 13,950 lekë.
Rritja e arkëtimeve nga ky zë është veçanërisht e rëndësishme për financimin e skemës së pensioneve dhe të sigurimeve shëndetësore, të cilat mbështeten në një masë të madhe te kontributet e paguara nga të punësuarit dhe punëdhënësit.
