Inflacioni i matur përmes Indeksit të Harmonizuar të Çmimeve të Konsumit (IHÇK) arriti në 3.4% në korrik 2026, ndërsa ushqimet vijuan të ishin faktori kryesor që ndikoi në rritjen e kostos së jetesës.
Sipas të dhënave të publikuara nga INSTAT, grupi “Ushqime dhe pije joalkoolike” regjistroi një rritje vjetore të çmimeve prej 3.2%, duke dhënë një kontribut prej 1.09 pikë përqindjeje në normën totale të inflacionit.
Rritjen më të fortë vjetore mes grupeve kryesore e regjistroi “Argëtim, sport dhe kulturë”, ku çmimet ishin 8.5% më të larta se një vit më parë. Ky grup kontribuoi me 0.55 pikë përqindjeje në inflacionin vjetor.
Edhe shërbimet e lidhura me turizmin vijuan të shtrenjtohen. Çmimet në grupin “Restorante dhe shërbime akomodimi”u rritën me 3.6% në krahasim me korrikun e vitit të kaluar, duke kontribuar me 0.53 pikë përqindjeje në rritjen e përgjithshme të çmimeve.
Një rritje e konsiderueshme u regjistrua edhe në transport, ku çmimet rezultuan 4.6% më të larta në bazë vjetore. Pijet alkoolike dhe duhani u shtrenjtuan me 4.5%, shërbimi arsimor me 3.3%, ndërsa çmimet për kujdesin personal, mbrojtjen sociale dhe shërbime të tjera u rritën me 3.5%.
Në krahasim me qershorin, megjithatë, niveli i përgjithshëm i çmimeve shënoi një rënie të lehtë prej 0.1%. Ulja mujore u ndikua kryesisht nga informacioni dhe komunikimi, ku çmimet ranë me 1.3%, veshjet dhe këpucët me 1.2%, sigurimet dhe shërbimet financiare me 1%, ndërsa ushqimet dhe pijet joalkoolike u liruan me 0.9%.
Në kahun e kundërt, transporti u shtrenjtua me 2.5% vetëm brenda një muaji, ndërsa grupi që përfshin qiranë, ujin, energjinë elektrike, gazin dhe karburantet e tjera regjistroi një rritje mujore prej 1%.
Të dhënat e detajuara tregojnë gjithashtu se veshjet dhe këpucët ishin ndër të paktat kategori me rënie vjetore të çmimeve, me -0.5%, ndërsa informacioni dhe komunikimi shënoi një rënie prej 0.6% krahasuar me korrikun e vitit të kaluar.
IHÇK përdoret për krahasimin e inflacionit mes vendeve evropiane dhe përfshin shpenzimet e kryera brenda territorit të Shqipërisë, përfshirë edhe ato të turistëve të huaj. /skyweb.al
