Shqipëria kishte në vitin 2025 peshën më të lartë të shpenzimeve për ushqime në raport me ekonominë në Europë.
Sipas të dhënave të Eurostat, shqiptarët shpenzuan rreth 5.1 miliardë euro për ushqime, ose sa 20.4% e Prodhimit të Brendshëm Bruto. Mesatarja e Bashkimit Europian ishte vetëm 6.2%, më shumë se tri herë më e ulët.
Edhe vendet e rajonit renditen poshtë Shqipërisë: Mali i Zi në 19.9%, Bosnjë-Hercegovina 19.1%, Maqedonia e Veriut 17.9% dhe Serbia 12.8%.
Pesha e lartë lidhet kryesisht me të ardhurat e ulëta, të cilat detyrojnë familjet shqiptare të përdorin një pjesë të madhe të buxhetit për nevojat bazë.
Por problemi rëndohet edhe nga çmimet, pasi në vitin 2025 ushqimet në Shqipëri u bënë për herë të parë më të shtrenjta se mesatarja e BE-së.
Indeksi i çmimeve arriti në 102.9, ndërsa në vitin 2022 ishte vetëm rreth 85.
Shqipëria rezulton veçanërisht e shtrenjtë për qumështin, bulmetin dhe vezët, ku çmimet janë 35.6% mbi mesataren e BE-së.
Për këtë kategori shqiptarët shpenzojnë rreth 1.1 miliardë euro në vit, ndërsa për mishin afro 1.2 miliardë euro.
Vetëm ushqimet zënë një të pestën e gjithë ekonomisë shqiptare, ndërkohë që konsumi individual për frymë është vetëm 48% e mesatares europiane.
Të dhënat tregojnë kështu një paradoks të fortë: shqiptarët kanë ndër të ardhurat më të ulëta në Europë, por për një pjesë të produkteve bazë paguajnë çmime të njëjta ose edhe më të larta se qytetarët e BE-së. /Marrë me shkurtime nga Monitor
