Ndryshimet klimatike pritet të rrisin ndjeshëm nivelin e detit përgjatë bregdetit shqiptar, duke shtuar rrezikun për plazhet, hotelet dhe qytetet bregdetare.
Sipas dokumentit të ri klimatik të miratuar nga qeveria, niveli i detit projektohet të rritet me rreth 11 centimetra deri në vitin 2030.
Deri në vitin 2050, rritja mund të arrijë në 20–28 centimetra, sipas skenarëve të analizuar.
Dokumenti paralajmëron se kjo tendencë mund të prekë drejtpërdrejt sektorin e turizmit, veçanërisht zonat që mbështeten te pushimet e detit dhe plazhit.
Rreziku i ardhshëm për turizmin “diell dhe det” klasifikohet nga i lartë në shumë i lartë.
Rritja e nivelit të detit mund të dëmtojë plazhet, strukturat akomoduese përgjatë vijës bregdetare dhe qytetet që varen nga turizmi.
Në rrezik janë gjithashtu edhe site të trashëgimisë kulturore që ndodhen pranë bregdetit.
Dokumenti vlerëson se turizmi, së bashku me bujqësinë dhe zonat urbane, është ndër sektorët më të ekspozuar ndaj ndryshimeve klimatike në vitet e ardhshme. /skyweb.al
