Kryeministri Edi Rama njoftoi përmes një videomesazhi në Facebook se nga 1 janari i vitit të ardhshëm paga minimale do të arrijë në 500 euro, ndërsa në fund të mandatit qeverisës synohet të shkojë në 700 euro.
Në të njëjtin mesazh, Rama theksoi se buxheti i vitit 2026 do të ketë si prioritet kryesor pensionistët, të cilët do të përfitojnë 100 milionë euro shtesë, përveç indeksimit. Sipas tij, kjo shumë do të dyfishohet në 2027, duke arritur në 200 milionë euro plus indeksimin, dhe do të vijojë të trefishohet e katërfishohet çdo vit deri në 2030.
“Në projektbuxhetin e vitit 2026 pjesën e luanit e zënë pensionistët. Në 2027 e dyfishojmë shtesën në 200 milionë euro, në 2028 e trefishojmë, në 2029 e katërfishojmë, dhe në 2030 e pesëfishojmë. Në total janë rreth 1.7 miliardë euro më shumë për pensionistët gjatë këtij mandati”, tha Rama.
Ai shtoi se nga 1 janari 2026 rritja e pagës minimale do të përfshijë 307,850 punonjës, ndërsa qeveria do të subvencionojë me 90 milionë euro shtesën e kostove për 9 muaj në sektorin privat.
“Ky jam unë dhe këta jemi ne; themi atë që bëjmë dhe bëjmë atë që themi. 83 mandatet që ju na dhatë janë 83 arsye më shumë për të mos fjetur gjumë dhe për të punuar pa pushim për t’ju kthyer besimin e jashtëzakonshëm që na dhatë”, përfundoi Rama. /skyweb.al
