Kryeministri Edi Rama, i pranishëm në Forumin e Cernobbios në Itali, ka folur për perspektivën europiane të Shqipërisë dhe mënyrën se si vendi mund të afrohet gradualisht me Bashkimin Europian.
Rama u shpreh se procesi i integrimit duhet të nisë nga aspektet konkrete, përmes përfshirjes së Shqipërisë në tregun e përbashkët europian, universiteteve dhe programeve të shkëmbimit. Sipas tij, afrimi me BE-në nuk duhet të kushtëzohet vetëm nga anëtarësimi formal dhe mekanizmi i vetos.
“Integrimi gradual është mënyra e vetme për të na futur brenda dhe për ta nisur nga pjesa reale: tregu i përbashkët, të qenit pjesë e Europës së universiteteve, shkëmbimeve, të të gjithë elementëve shumë të rëndësishëm, para se të mendojmë për pjesën tjetër”, deklaroi Rama.
Kryeministri shprehu gjithashtu skepticizëm se zgjerimi i Bashkimit Europian do të përparojë me ritme të shpejta përmes mekanizmit të vetos.
“Nuk besoj se 2027-a do të na presë lumturisht me kompetencën tonë të vetos. Nuk besoj se disa kryeqytete do të kenë aftësinë t’i thonë publikut: ‘Do ta marrim Shqipërinë me kompetencën e vetos’”, tha ai.
Rama theksoi se Shqipërisë nuk i nevojitet domosdoshmërisht e drejta e vetos për të qenë pjesë e vendimmarrjes europiane.
“Nuk na duhet kompetenca e vetos për t’u ulur rreth tryezës. Imagjinoni të kesh edhe 7 të marrë të tjerë të ulur rreth asaj tryeze. Do të ishte më mirë për Europën dhe për ne”, përfundoi kryeministri.
