Organizata Botërore e Shëndetësisë (OBSH) paralajmëron se pirja e duhanit mund të ndikojë negativisht në fertilitetin e grave dhe burrave, ndërsa mund të ulë edhe shanset për sukses të disa trajtimeve të fertilitetit.
Sipas një publikimi të ri të OBSH-së, gratë që aktualisht pinë duhan kanë rreth 40% më shumë rrezik për infertilitet krahasuar me ato që nuk pinë. Ndërkohë, gratë që kanë lënë duhanin mund të kenë një rrezik rreth 25% më të ulët krahasuar me ato që vazhdojnë të pinë, çka tregon se ndërprerja e duhanit mund të sjellë përfitime të rëndësishme për shëndetin riprodhues.
OBSH thekson se infertiliteti nuk është vetëm një problem i shëndetit të grave. Një përmbledhje e 44 studimeve, ku morën pjesë më shumë se 60 mijë burra, gjeti se duhanpirja lidhet me probleme të funksionit riprodhues, përfshirë cilësi më të dobët të spermës dhe probleme seksuale.
Burrat që pinë duhan rezultojnë më të rrezikuar për disfunksion erektil, probleme me ejakulimin, lëvizshmëri të dobët të spermatozoideve dhe ndryshime në formën e tyre.
Duhani mund të ndikojë edhe te personat që i drejtohen trajtimeve të fertilitetit. OBSH citon studime që tregojnë se pirja e cigareve lidhet me më pak shtatzëni dhe lindje të gjalla pas trajtimeve të riprodhimit të asistuar, përfshirë fertilizimin in vitro. Sipas të dhënave të cituara, duhanpirja mund të përgjysmojë shanset për rezultate të suksesshme.
Rreziku nuk lidhet vetëm me duhanpirësit. OBSH paralajmëron se ekspozimi ndaj tymit të duhanit të të tjerëve mund të rrisë rrezikun e infertilitetit te gratë dhe të ulë mundësinë për të mbetur shtatzënë gjatë çdo muaji që përpiqen.
Në nivel global, rreth një në gjashtë persona në moshë riprodhuese përballet me infertilitet në një moment të jetës. Infertiliteti përkufizohet si pamundësia për të arritur një shtatzëni pas 12 muajsh ose më shumë marrëdhëniesh seksuale të rregullta dhe pa mbrojtje.
OBSH thekson se provat shkencore janë më të forta për cigaret tradicionale, ndërsa për produkte të tjera, si cigaret elektronike, nargjilet dhe produktet e duhanit pa tym, të dhënat janë ende në zhvillim. Megjithatë, organizata paralajmëron se edhe këto produkte mund të paraqesin rreziqe për fertilitetin dhe kërkojnë studime të mëtejshme. /skyweb.al
