Shoqata Kombëtare e Ndërmjetësve të Pasurive të Paluajtshme të Shqipërisë (NAREA), që përfaqëson mbi 115 zyra të real estate, i ka kërkuar qeverisë uljen e tatimit mbi të ardhurat nga shitja e pasurive të paluajtshme nga 15% që është aktualisht, në vetëm 3%.
Sipas shoqatës, barra fiskale e lartë ka sjellë pasoja të dukshme negative në treg, duke ngadalësuar transaksionet, duke ulur të ardhurat në buxhetin e shtetit dhe duke nxitur informalitetin. Në përllogaritjet e kryera nga ekspertët rezulton se gjatë viteve 2020–2022, kur tatimi ishte në nivelin 3%, të ardhurat mesatare vjetore në buxhetin e shtetit nga rishitja e pasurive kanë qenë rreth 44 milionë euro, një shifër 60% më e lartë se në periudhat kur norma e tatimit ka qenë 15%.
“Në kushtet aktuale, tatimi i lartë ngurtëson investimet dhe i kushton ekonomisë shqiptare të paktën 40 milionë euro më pak të ardhura në vit”, thekson NAREA.
Shoqata ka propozuar gjithashtu që periudha e rivlerësimit të pasurive të paluajtshme të zgjatet për 12 muaj, nga 1 tetori 2025 deri më 30 shtator 2026, duke theksuar se nga rreth 4.5 milionë pasuri të regjistruara, vetëm 250 mijë janë rivlerësuar në të kaluarën, ndërkohë që aktualisht të paktën 500 mijë banesa mbeten për rivlerësim.
NAREA propozon që tatimi të diferencohet sipas tipologjisë së pasurisë: 3% për banesat dhe 5% për pasuritë e tjera. Sipas shoqatës, ky diferencim do të ndihmonte lehtësimin e barrës fiskale për familjet dhe do ta bënte më të përballueshëm strehimin.
Shoqata thekson se këto propozime janë mbështetur mbi praktikat e vendeve kryesore të Bashkimit Europian, ku tatimi mbi transaksionet e banesave është më i ulët dhe i përshtatur për të nxitur tregun e banesave./skyweb.al
