Policia e Sarandës ka shpallur në kërkim biznesmenin e njohur Sokol Meqemeja , pasi rezulton se po ndërtonte pa leje një impiant gazi (TEC) në një pronë publike në zonën e Delvinës.
Operacioni u zhvillua në bashkëpunim mes Policisë së Vlorës dhe Sarandës, Inspektoratit Kombëtar të Mbrojtjes së Territorit (IKMT) Tiranë dhe Inspektoratit të Mjedisit.
Hetimet nisën pas informacioneve se në një tokë shtetërore ishte duke u ngritur një impiant i paligjshëm gazi. Gjatë kontrollit të ushtruar në kantier, u konstatua ndërtimi pa leje zhvillimi dhe ndërtimi nga institucionet përkatëse.
Si rezultat, u arrestuan në flagrancë dy punonjës të kompanisë:
- Elton Malkaj, 31 vjeç, përgjegjës i impiantit;
- Luan Metaj, 53 vjeç, përgjegjës i kantierit të ndërtimit.
Ndaj tyre rëndojnë akuzat për “Ndërtim të paligjshëm” dhe “Pushtim të tokës”, me qëllim përfitimi.
Ndërkohë, pronari i kompanisë, Sokol Meqemeja, 56 vjeç, si dhe administratori, Juglerd Ibrahimi, 36 vjeç, janë shpallur në kërkim, të dy të dyshuar për të njëjtat vepra penale.
IKMT ka bllokuar punimet dhe ka hartuar procesverbalin për shkeljet e konstatuara. Materialet janë referuar Prokurorisë së Sarandës për veprime të mëtejshme procedurale.
Njoftimi i policisë:
Në kuadër të masave të ndërmarra për parandalimin dhe goditjen e rasteve të ndërtimeve të paligjshme që cenojnë territorin dhe mjedisin, strukturat e Seksionit për Hetimin e Krimit Ekonomik dhe Financiar të DVP Vlorë, në bashkëpunim me inspektorët e IKMT Tiranë dhe me Inspektoratin e Mjedisit, ushtruan kontroll në një subjekt privat (kompani gazi), në Delvinë.
Gjatë kontrollit u konstatua se kjo kompani po ndërtonte një impiant gazi (TEC), në pronë publike, pa leje ndërtimi dhe zhvillimi nga organet kompetente.
Në përfundim të veprimeve të para procedurale, specialistët për Hetimin e Krimeve arrestuan në flagrancë shtetasit:
E. M., 31 vjeç, me detyrë përgjegjës i impiantit të gazit, dhe L. M., 53 vjeç, me detyrë përgjegjës i kantierit të ndërtimit, të dy të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.
Gjithashtu, u shpallën në kërkim shtetasit:
S. M., 56 vjeç, pronari i kompanisë, dhe J. I., 36 vjeç, administratori i kompanisë, të dy gjithashtu të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.
Nga ana e IKMT-së është mbajtur procesverbali për konstatimin e kundërvajtjes dhe është bërë bllokimi i punimeve në këtë objekt.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
