Sipas të dhënave më të fundit të “Institutit të Statistikave”, në gjysmën e parë të vitit, në hapësirën ajrore shqiptare kanë fluturuar gjithsej rreth 175 mijë avionë, ku pjesëm më të madhe e zë numri i mbikalimeve. Numri i fluturimeve në vendin tonë për gjashtë muajt e parë të vitit është regjistruar në rreth 31 mijë.
Numri i pasagjerëve që kanë udhëtuar me linja ajrore në gjysmën e parë të vitit 2025, është në rreth 5 milionë, me një rritje vjetore prej 7%, krahasuar me të njetën periudhë të një viti më parë.
Sipas të dhënave zyrtare nga “Aeroporti Ndërkombëtar i Tiranës” ka patur rritje domethënëse në numrin e pasagjerëve, në kapacitetin e vendeve dhe në faktorët e ngarkesës, duke treguar një angazhim serioz për pasagjerët. Referuar shifrave më të fundit të institucionit, vetëm në muajin qershor kanë udhëtuar rreth 1.1 milionë pasagjerë, me një rritje prej 8%. Këtë fluks të lartë e konfirmojnë edhe të dhënat mbi lëvizjen e shtetasve të publikuara pak ditë më parë nga “Instituti i Statistikave”.
Kjo falë edhe linjave të reja dhe, veçanërisht, mundësive për lidhje me vende që nuk ishin lehtësisht të aksesueshme më parë. Pak ditë më parë Aeroporti Ndërkombëtar i Tiranës (TIA) njoftoi lançimin e dy linjave të reja direkte të operuara nga Transavia, Nantes–Tirana dhe Bordeaux–Tirana.
Nëse do të flisnim për mallrat, rezulton se përgjatë tremujorit të dytë të vitit 2025, volumi i mallrave (duke përfshirë postën) të hyrë dhe të dalë nëpërmjet transportit ajror rezultoi 798.6 ton, nga të cilat 67.5% janë mallra të hyrë dhe 32.5% janë mallra të dalë. Krahasuar me tremujorin e dytë 2024, volumi i mallrave paraqitet me rritje 42.4%.
