Qeveria shqiptare ka miratuar zyrtarisht Strategjinë e re Kombëtare të Turizmit për periudhën 2024–2030, e cila për herë të parë ndan vendin në gjashtë rajone të reja turistike. Këto janë: rajoni i bregdetit të Adriatikut, rajoni verior i brendshëm, rajoni i Tiranës, rajoni qendror, rajoni i bregdetit të Jonit dhe rajoni jugor i brendshëm.
Strategjia përcakton objektiva konkrete për rritjen e të ardhurave nga turizmi deri në vitin 2030, duke synuar zgjerimin e kapaciteteve akomoduese, përmirësimin e standardeve të shërbimit dhe forcimin e rolit të agjencive shtetërore në zhvillimin e industrisë turistike.
Në një mesazh publik, ministrja e Turizmit dhe Mjedisit, Mirela Kumbaro, theksoi se dokumenti mbështetet në gjashtë shtylla themelore: investimet, politikat fiskale dhe rregullatore, menaxhimi i destinacioneve, zhvillimi i produktit turistik, marketingu i destinacioneve dhe ngritja e kapaciteteve. Sipas saj, strategjia është ndërtuar mbi tre parime kryesore social, mjedisor dhe ekonomik dhe është rezultat i një procesi të gjatë konsultimi me grupet e interesit.
“Sot mirënjohje për të gjithë stafin e Ministrisë së Turizmit dhe Mjedisit, për ata dhjetëra specialistë që u përfshinë në hartimin e kësaj strategjie dhe sigurisht për partnerët tanë të GIZ që japin një kontribut të çmuar në zhvillimin e turizmit të qëndrueshëm”, u shpreh Kumbaro./skyweb.al
