Qeveria ka miratuar një vendim të ri që synon të ndihmojë familjet në nevojë për strehim, përmes një skeme kredie me interes 0%, të subvencionuar plotësisht nga buxheti i shtetit. Programi do të zbatohet nga Enti Kombëtar i Banesave (EKB) dhe parashikon procedura të qarta për aplikimin dhe përzgjedhjen e përfituesve.
Skema përfshin kategori specifike të popullatës që përballen me vështirësi strehimi, si:
Familjet që jetojnë me qira në ish-prona private,
Familjet e punonjësve të Policisë së Shtetit që kanë humbur jetën në krye të detyrës,
Fëmijët nën kujdesin e Republikës.
Aplikimi bëhet online nga kryefamiljari ose kujdestari ligjor, nëpërmjet portalit “e-Albania”, në seksionin përkatës të sistemit të EKB-së. Aplikuesit duhet të ngarkojnë një sërë dokumentesh që vërtetojnë se nuk kanë në pronësi banesë të regjistruar ose në proces regjistrimi në gjithë territorin e Shqipërisë, ose që posedojnë një banesë nën normat minimale të banimit.
Dokumentacioni përfshin certifikatën familjare, vërtetime nga Kadastra dhe Drejtoria e Tatimeve, si dhe, në rastin e kategorive të veçanta, prova ligjore dhe sociale që vërtetojnë statusin përkatës.
Pas dorëzimit të aplikimeve, në Entin Kombëtar të Banesave ngrihet një komision ad hoc, me urdhër të drejtorit të përgjithshëm, i cili shqyrton kërkesat brenda 10 ditëve nga ngritja. Lista e përfituesve miratohet nga ky komision. Aplikantët që marrin përgjigje negative mund të paraqesin ankim administrativ brenda 5 ditëve nga marrja e njoftimit, në përputhje me Kodin e Procedurave Administrative.
Programi parashikon që interesat e kredive për blerjen e banesave me kosto të ulët të subvencionohen 100%, duke i bërë ato me normë interesi 0%. Marrëveshjet për ekzekutimin e kredive realizohen përmes institucioneve financiare që kanë kontratë me ministrinë përgjegjëse për çështjet e strehimit.
Ky vendim shihet si një hap i rëndësishëm për të lehtësuar barrën ekonomike të shtresave në nevojë dhe për të mundësuar aksesin në banesa të sigurta dhe të përballueshme./skyweb.al
