Policia e Shtetit u ka drejtuar një apel nxënësve dhe prindërve për të ruajtur qetësinë dhe për t’u distancuar nga çdo akt dhune, ndërsa protestat e të rinjve vijojnë në Tiranë dhe qytete të tjera të vendit.
Në mesazhin drejtuar nxënësve, Policia kërkon që ata të mos përfshihen në veprime që mund të rrezikojnë jetën, shëndetin dhe të ardhmen e tyre.
“Të dashur nxënës, mos u përfshini në veprime të dhunshme që rrezikojnë jetën, shëndetin dhe të ardhmen tuaj! Mos lejoni që askush t’ju përfshijë në situata të rrezikshme!”, thuhet në thirrje.
Policia u kërkon të rinjve të largohen menjëherë nga vendet ku ushtrohet dhunë.
Një apel i veçantë u është drejtuar prindërve, të cilëve u kërkohet të kujdesen për fëmijët dhe t’i këshillojnë që të qëndrojnë larg situatave të dhunshme.
“Kujdesuni për fëmijët tuaj! Këshillojini fëmijët të qëndrojnë larg çdo situate të dhunshme. Siguria e tyre është përgjegjësi e përbashkët!”, thekson Policia e Shtetit.
