Qeveria ka përcaktuar rregulla të reja për gjurmimin e kanabisit të kultivuar për qëllime mjekësore dhe industriale, duke parashikuar kontrollin e çdo bime nga importimi i farës deri në eksportimin ose asgjësimin e produktit përfundimtar.
Sipas vendimit, çdo farë, fidan, klon, bimë, lot prodhimi, mbetje apo produkt i përpunuar do të pajiset me një etiketë të veçantë, e cila do të përmbajë një numër unik identifikimi, barkod ose kod QR dhe teknologjinë RFID.
Kjo teknologji do të mundësojë leximin e etiketave në distancë, përfshirë kontrollin njëkohësisht të disa bimëve dhe monitorimin e sipërfaqeve të mëdha përmes pajisjeve të integruara në dronë.
Sistemi do të regjistrojë në kohë reale origjinën, vendndodhjen, fazën e kultivimit, sasitë e prodhuara, lëndët e përdorura gjatë përpunimit, transportin, magazinimin, eksportin, konfiskimin dhe asgjësimin e çdo materiali.
Autoriteti i autorizuar për shenjimin dhe gjurmimin do të jetë shoqëria shtetërore “ALBTrace CO” sh.a., e cila do të prodhojë dhe shpërndajë etiketat, do të administrojë teknikisht sistemin dhe do të garantojë sigurinë e të dhënave.
Ndërkohë, Agjencia Kombëtare e Kontrollit të Cannabis-it do të jetë administratori i vetëm i të dhënave dhe do të ketë akses të plotë për kontrollin, inspektimin dhe miratimin e veprimeve që kryhen në sistem.
Etiketat do të jenë të papërsëritshme dhe nuk do të mund të hiqen pa u dëmtuar. Ato do të kenë ngjyra të ndryshme, në varësi nëse kanabisi kultivohet për qëllime mjekësore, për prodhimin e lules apo për përftimin e farës dhe fibrës.
Në rastin e bimëve, etiketa do të vendoset individualisht që në fazën e fidanit ose të klonit. Kur bima të korret dhe të ndahet në lote të reja, sistemi do të lidhë produktin e ri me numrat identifikues të bimëve nga të cilat është përftuar.
Të dhënat për veprimet e përdoruesve do të ruhen gjatë gjithë vlefshmërisë së licencës dhe deri në 20 vjet pas përfundimit të saj. Sistemi do t’u nënshtrohet gjithashtu auditimeve të pavarura të paktën një herë në vit.
Subjektet e licencuara do të mbajnë përgjegjësi për regjistrimin e saktë dhe në kohë të çdo procesi. Mosraportimi ose deklarimi i të dhënave që nuk përputhen me situatën reale do të konsiderohet shkelje. /skyweb.al
