Kryeministri Edi Rama u ka kërkuar bizneseve të dëmtuara gjatë protestave të fundit të deklarojnë dëmet përmes një dritareje të posaçme që do të hapet në e-Albania.
Sipas Ramës, qeveria do të mbledhë të dhënat për dëmet e shkaktuara dhe më pas do të nisë verifikimin e tyre në terren, me fokus fillimisht bizneset e vogla në Tiranë.
Në aplikim, bizneset do të duhet të plotësojnë të dhënat personale dhe të subjektit, përfshirë NIPT-in, kontaktet, sipërfaqen e aktivitetit, kompaninë e sigurimit dhe një vlerësim paraprak të dëmit.
Do të kërkohet gjithashtu ngarkimi i fotove që dokumentojnë dëmet dhe faturave përkatëse.
Rama bëri të ditur se në procesin e verifikimit do të kontrollohet edhe marrëdhënia e biznesit me shtetin sa i përket pagesës së detyrimeve.
“Pasi të bëjmë verifikimet, do të mbledhim një regjistër të të gjitha dëmeve. Ne do t’ju vijmë në ndihmë të gjithëve”, deklaroi kryeministri.
Për këtë proces do të angazhohen 10 grupe verifikimi nga Tatimet, të cilat do të dalin në terren për të parë nga afër dëmet e deklaruara nga bizneset.
“Çdo biznes që është dëmtuar nga vala e dhunës ka një dritare ku do të mund të regjistrojë dëmin”, tha Rama, duke paralajmëruar se të dhënat e raportuara do të kontrollohen përpara se të vendoset për mbështetjen.
Kryeministri e lidhi këtë ndërhyrje me dëmet e shkaktuara gjatë protestave të dhunshme në kryeqytet, ku disa biznese janë goditur dhe dëmtuar gjatë përplasjeve.
Në të njëjtën kohë, Rama u përpoq të ndajë protestën e studentëve nga aktet e dhunës, duke deklaruar se e drejta për të protestuar do të respektohet.
“I respektojmë studentët dhe i çmojmë si shtysën për të ecur më shpejt përpara. Zëri i tyre dhe i çdo të riu duhet dhe do të dëgjohet me respekt”, tha ai.
Tashmë bizneset e prekura do të duhet të kalojnë përmes e-Albania dhe verifikimit të Tatimeve për të dokumentuar dëmet, ndërsa mbetet për t’u parë si do të përcaktohet masa e kompensimit dhe cilat dëme do të njihen nga shteti.
