Depozitat e klientëve nuk cenohen nga dëmtimet e degëve bankare dhe ATM-ve gjatë protestave të ditëve të fundit në Tiranë. Shoqata Shqiptare e Bankave (AAB) sqaron se dëmet janë materiale dhe nuk prekin, në vetvete, paratë e depozituesve apo funksionimin e sistemit bankar.
Reagimi vjen pasi disa ambiente dhe pajisje bankare janë dëmtuar, duke sjellë edhe kufizime të përkohshme në shërbimin ndaj qytetarëve.
Për sigurinë e klientëve dhe punonjësve, një pjesë e bankave kanë reduktuar numrin e degëve të hapura ose kanë shkurtuar oraret e shërbimit.
Sipas AAB-së, bankat vijojnë të zbatojnë procedurat për mbrojtjen e klientëve dhe vazhdimësinë e aktivitetit. Megjithatë, në disa degë mund të ketë vonesa dhe vështirësi në ofrimin e shërbimeve.
Klientëve u rekomandohet të kontrollojnë njoftimet zyrtare të bankës së tyre përpara se të paraqiten në sportel, pasi oraret do të varen nga situata dhe vlerësimet e sigurisë.
Për pagesat, transfertat dhe veprimet që mund të kryhen në distancë, shoqata rekomandon përdorimin e shërbimeve bankare digjitale.
AAB bën thirrje të shmangen sulmet ndaj degëve dhe objekteve financiare, duke theksuar rëndësinë e tyre për qytetarët, bizneset dhe ekonominë. Shërbimet do të rikthehen në normalitet sapo kushtet e sigurisë ta lejojnë.
