Behgjet Pacolli ka sinjalizuar tërheqjen nga projekti i Aeroportit të Vlorës, pas përplasjes së ashpër me Valon Ademin dhe ndërhyrjes së autoriteteve shqiptare në kantier.
Në një reagim në rrjetet sociale, Pacolli shprehet se aeroporti nuk është më nën kontrollin e tij dhe se nuk ka ndërmend të hyjë në përplasje me shtetin shqiptar. Megjithatë, ai e cilëson mënyrën se si është vepruar si të paligjshme dhe të papranueshme për një vend që pretendon të funksionojë si shtet ligjor.
Sipas Pacollit, Aeroporti i Vlorës është ndërtuar me mjetet e tij financiare, ndërsa investimi dhe garancitë e angazhuara arrijnë në mbi 310 milionë euro.
“Aeroporti është ndërtuar ekskluzivisht me mjetet e mia financiare. Janë mbi 310 milionë euro të investuara dhe të angazhuara në formë garancish. Vetëm Valon Ademi, si punëkryes, ka marrë mbi 35 milionë euro nga garancioni i MABCO-s.
Aeroportin, le ta marrin! Unë nuk dua të luftoj me shtetin. Shteti e ka fuqinë e vet dhe mund ta përdorë si të dojë. Por mënyra se si po përdoret kjo fuqi është joligjore dhe e papranueshme për një vend që pretendon të jetë shtet ligjor. Çfarë ka ndodhur dhe si ka ndodhur, koha do ta tregojë. Pa merak”, shkruan Pacolli.
Reagimi i Pacollit vjen pas tensioneve të ditëve të fundit në kantierin e Aeroportit të Vlorës, ku sipas tij, punonjësit e kompanisë MABCO nuk janë lejuar të futen në mjediset e punës.
Situata lidhet me konfliktin mes Pacollit dhe Valon Ademit, aksionerit tjetër në projekt. Pacolli pretendon se ndërhyrja e autoriteteve ka favorizuar palën tjetër në konflikt, duke e larguar efektivisht MABCO-n nga kontrolli i projektit.
Kjo e çon përplasjen nga një konflikt mes ortakësh në një çështje me pasoja të mundshme ligjore për shtetin shqiptar. Megjithëse Pacolli nuk e përmend drejtpërdrejt arbitrazhin në reagimin e tij, pretendimi për përdorim të paligjshëm të fuqisë shtetërore dhe humbje të kontrollit mbi një investim të madh lë të hapur mundësinë e një përballjeje ndërkombëtare ligjore.
I pyetur nga një gazetar shqiptar për fatin e punonjësve dhe nënkontraktorëve, Pacolli ka deklaruar se çdo detyrim do të shlyhet plotësisht.
“Ata janë paguar dhe çdo detyrim i mbetur do të paguhet deri në centin e fundit. Sa u përket punëtorëve dhe ekspertëve tanë, ne do të përpiqemi t’i angazhojmë në projekte të tjera jashtë vendit. Ata për ne kanë vlerë dhe nuk do të lihen pas dore”, shprehet Pacolli.
Aeroporti i Vlorës është konsideruar një nga projektet më të rëndësishme strategjike për turizmin në jug të vendit. Por konflikti mes aksionerëve dhe bllokimi i punimeve ka krijuar pasiguri mbi ecurinë e projektit, afatet e përfundimit dhe mënyrën se si do të vihet në funksion aeroporti.
Mbetet për t’u parë nëse autoritetet shqiptare do ta trajtojnë këtë çështje vetëm si konflikt privat mes aksionerëve, apo do të ndërhyjnë për të zhbllokuar projektin në funksion të interesit publik dhe për të garantuar vënien në punë të aeroportit.
/skyweb.al
