Gjiganti amerikan i prodhimit të avionëve, Boeing, po zhvillon bisedime me autoritetet kineze për një marrëveshje që mund të përfshijë deri në 500 avionë, raportoi Bloomberg të enjten, duke cituar burime të afërta me çështjen.
Lajmi ndikoi menjëherë në bursë, ku aksionet e Boeing u rritën me rreth 2% para hapjes së tregut, pasi një kontratë e tillë do të ishte porosia e parë e madhe kineze për Boeing që prej vizitës së ish-presidentit amerikan Donald Trump në Kinë gjatë mandatit të tij të parë.
Negociatat mes dy palëve lidhen me modelet e avionëve, tipologjinë dhe afatet e dorëzimit, ndërsa raportohet se kjo kontratë mund të kthehet në shtyllën kryesore të një marrëveshjeje tregtare mes dy ekonomive më të mëdha të botës.
Boeing nuk ka pranuar të komentojë mbi këto raportime.
Një marrëveshje e përmasave kaq të mëdha do të përbënte një hap vendimtar për kompaninë amerikane në tregun e dytë më të madh të aviacionit në botë, ku prej vitesh ka hasur vështirësi për shkak të tensioneve tregtare mes Uashingtonit dhe Pekinit. Ajo do të ndihmonte gjithashtu Boeing të ngushtojë diferencën me rivalin europian Airbus, i cili vitet e fundit ka arritur të forcojë ndjeshëm pozitat e tij në Kinë.
Sipas raportimeve, zyrtarë kinezë kanë nisur konsultimet me linjat ajrore vendase për të përcaktuar nevojat konkrete për avionët e Boeing.
Porositë e avionëve po bëhen gjithnjë e më shumë pjesë e diplomacisë tregtare amerikane. Më herët këtë vit, gjatë një vizite në Lindjen e Mesme, Boeing siguroi një nga kontratat më të mëdha në historinë e saj, ku Qatar Airways ra dakord të blinte 160 avionë me “trup të gjerë”, me opsion për edhe 50 të tjerë, së bashku me motorët e GE Aerospace, në një paketë me vlerë rreth 96 miliardë dollarë.
Një kontratë e ngjashme me Kinën do të kishte jo vetëm rëndësi tregtare, por edhe peshë të madhe gjeopolitike në balancimin e marrëdhënieve ekonomike mes dy fuqive botërore. /skyweb.al
