Sipas kursit zyrtar të Bankës së Shqipërisë, dollari amerikan u këmbye në fund të javës me 81,20 lekë, nga 81,88 lekë që ishte në fillim të saj. Kjo përfaqëson një rënie prej 0,68 lekësh të vlerës së dollarit.
Të njëjtën tendencë ndoqi edhe euroja, e cila zbriti në 91,32 lekë, nga 91,61 lekë në fillim të javës, duke humbur 0,29 lekë në raport me monedhën vendase.
Në kahun tjetër, paundi britanik shënoi një rritje të lehtë, duke u këmbyer me 108,37 lekë, krahasuar me 108,25 lekë në fillim të javës. Ndërsa franga zvicerane ra në 98,33 lekë, nga 98,56 lekë që ishte në nisje të periudhës.
Forcimi i lekut ndaj valutave kryesore vjen në një kohë kur Banka e Shqipërisë vijon ndërhyrjet në tregun e brendshëm valutor, përmes blerjes së valutës, me synimin për të frenuar mbiçmimin e mëtejshëm të monedhës vendase dhe për të zbutur luhatjet e kursit të këmbimit.
