Përplasjet e forta të pesë ditëve të fundit kanë nxjerrë në rrugët e Tiranës arsenalin e Policisë për menaxhimin e turmave. Gaz lotsjellës, ujëhedhëse dhe, sipas raportimeve nga terreni, ujë i përzier me kimikate lakrimogjene janë përdorur për shpërndarjen e protestuesve.
Përballja ka vijuar këtë të shtunë edhe përpara Kryeministrisë, pas zhvendosjes së protestuesve nga zona e Ministrisë së Arsimit. Grupe protestuesish po hedhin gurë dhe copa pllakash drejt forcave të rendit, ndërsa policia është kundërpërgjigjur me ujë me presion dhe gaz lotsjellës, por shpesh edhe me gurë.
Përgatitja për përballjen
Përgatitjet për furnizimin e automjeteve speciale me lëndë irrituese kishin nisur muaj më parë. Skyweb.al raportoi më 11 maj se Drejtoria e Përgjithshme e Policisë së Shtetit kishte hapur me urgjencë një tender me fond limit rreth 61 milionë leke të vjetra me TVSH për “OC Gas Solution”, preparat që përdoret nga ujëhedhëset për shpërndarjen e turmave.
Policia e argumentonte shkurtimin e afateve me “kushtet e emergjencës”, ç’ka lidhej me protestat që sapo kishin nisur. Sipas dokumentacionit të publikuar në maj, automjetet e menaxhimit të turmave nuk ishin të furnizuara me këtë lëndë, gjë që ndikonte në gatishmërinë e tyre. Në të njëjtin arsyetim përmendej edhe marrja e pritshme e dy automjeteve të reja, për të cilat nevojitej furnizimi fillestar për testimin, trajnimin e operatorëve dhe vënien në shërbim.
RO.GAT Security e Begator Manes u shpall fitues
Më pas, më 6 korrik, Skyweb.al raportoi shpalljen e fituesit. Kompania e përzgjedhur ishte “RO. GAT SECURITY” sh.p.k, me ofertë 48.8 milionë lekë pa TVSH, ose rreth 58.6 milionë lekë me TVSH, afro 586 milionë lekë të vjetra. Njoftimi i fituesit mbante datën 2 korrik.
Kjo shumë i përkiste vetëm furnizimit me lëndën irrituese për automjetet.
Kompania ROGAT Security është në pronësi të Begator Mane dhe Marsel Mane, me aktivitet në shërbimet e sigurisë, tregtimin e armëve e municioneve dhe administrimin e një poligoni qitjeje në Tiranë. Afati i furnizimit ishte 60 ditë nga lidhja e kontratës, ndërsa gjashtë nga tetë automjetet speciale përmendeshin si të gatshme për t’u furnizuar me OC.
Çfarë është lënda që u tenderua?
Oleoresin Capsicum është ekstrakt i specit djegës, i përdorur edhe në “spray-t me piper”. Përbërësit e tij shkaktojnë ndjesi të fortë djegieje në kontakt me sytë, lëkurën dhe rrugët e frymëmarrjes.
Preparati për automjetet speciale shpërndahet i përzier me ujë, në raportin 5–10% të përshkruar në dokumentacionin e raportuar nga Skyweb. Në këtë mënyrë, ujëhedhëset mund të shpërndajnë mbi turmën edhe lëndën irrituese. Kjo përqindje i referohet përzierjes së preparatit me ujë.
Ekspozimi mund të shkaktojë lotim, vështirësi për të mbajtur sytë hapur, djegie të lëkurës, kollë dhe probleme në frymëmarrje. Personat me astmë mund të pësojnë pasoja më të rënda, ndërsa rreziku shtohet nga ekspozimi i lartë ose i zgjatur. /skyweb.al
