Rama deklaroi se pas përshkallëzimit të protestave qëndrojnë interesa të lidhura me paranë, politikën dhe pushtetin, ndërsa pretendoi se sulmet organizohen nga persona të stërvitur dhe nxiten edhe nga aktorë të huaj.
Sipas kryeministrit, përmes pamjeve të dhunës dhe shkatërrimeve po krijohet perceptimi se e gjithë Shqipëria është përfshirë nga kaosi, ndërkohë që incidentet janë përqendruar në një perimetër të caktuar të kryeqytetit.
Ai theksoi se shqetësimet sociale të qytetarëve janë reale, por po përdoren nga interesa të tjera për të nxitur përplasjet dhe për të imponuar ndryshimin e pushtetit.
“Interesa të lidhura me natyrisht paranë, me politikën, me pushtetin, në kuptimin e nevojës ulëritëse për të përdorur këtë shqetësim social dhe për ta kthyer në valë gurësh për të rrëzuar qeverinë me imponimin e dhunës, gjë që s’ka për të ndodhur kurrë”, deklaroi Rama.
Kryeministri u ndal edhe te ndikimi që pamjet e protestave kanë në psikologjinë e qytetarëve, duke argumentuar se ato krijojnë një perceptim më të gjerë pasigurie.
“Krijon idenë se këtu po digjet e gjithë Shqipëria, ndërkohë që ky është një sulm i organizuar në një perimetër të mirëpërcaktuar, që orkestrohet nga duar që janë të stërvitura për këtë punë, që ushqehet me benzinë si një zjarr i brendshëm nga aktorë të huaj”, u shpreh ai.
Rama e lidhi situatën edhe me fenomenin e luftës hibride, të cilën e cilësoi një shqetësim gjithnjë e më të madh për vendet europiane.
“Është një luftë hibride që funksionon sepse bazohet te shqetësime reale, jo te fantazira”, deklaroi kryeministri.
Megjithatë, ai pranoi se qytetarët kanë shqetësime të ligjshme, veçanërisht për sigurinë ekonomike, strehimin dhe mundësitë për një të ardhme më të mirë.
Deklaratat vijnë në një kohë kur protestat në Tiranë janë shoqëruar me përplasje të dhunshme mes protestuesve dhe policisë, si dhe me dëmtime të institucioneve publike dhe bizneseve private.
Kryeministri nuk paraqiti në këtë deklaratë prova konkrete për përfshirjen e aktorëve të huaj apo identitetin e personave që, sipas tij, organizojnë sulmet.
Pavarësisht situatës së krijuar, Rama përsëriti qëndrimin se qeveria nuk do të rrëzohet përmes dhunës. /skyweb.al
