Banka e Shqipërisë ka reaguar pas sulmeve dhe dëmtimeve të disa degëve bankare dhe bankomateve gjatë ditëve të fundit, duke siguruar qytetarët se kursimet e tyre mbeten të mbrojtura.
Në një deklaratë për shtyp, institucioni thekson se dëmet në godinat dhe pajisjet e bankave nuk cenojnë qëndrueshmërinë financiare të sistemit dhe as sigurinë e depozitave.
Sipas Bankës së Shqipërisë, kufizimet e përkohshme të shërbimeve në disa degë janë ndërmarrë për të garantuar sigurinë fizike të klientëve dhe punonjësve.
Pavarësisht këtyre kufizimeve, sistemi i pagesave ka vijuar funksionimin normal, duke mbështetur transaksionet e qytetarëve dhe bizneseve.
Banka e Shqipërisë u kërkon klientëve të ndjekin njoftimet zyrtare të bankave përkatëse për oraret dhe disponueshmërinë e shërbimeve. Gjithashtu, nxit përdorimin e aplikacioneve bankare dhe kanaleve digjitale për kryerjen e veprimeve financiare.
Në deklaratë përcillet edhe një apel për respektimin e sigurisë së bankave, infrastrukturës dhe punonjësve të tyre gjatë ushtrimit të së drejtës legjitime për protestë.
Institucioni kujton se përmes sistemit bankar administrohen pagat, pensionet, kursimet dhe pagesat e bizneseve, ndaj mbrojtja e tij është në interes të të gjithë qytetarëve.
Banka e Shqipërisë bën të ditur se është në komunikim të vazhdueshëm me bankat tregtare dhe strukturat ligjzbatuese për të ndjekur situatën dhe për të garantuar vijimësinë e shërbimeve financiare.
