Gjatë një takimi me kryeministrin Edi Rama, ku ishin të pranishëm edhe anëtarë të Këshillit Mbikëqyrës të Bankës së Shqipërisë, Shella theksoi se aktiviteti bankar po zhvillohet normalisht.
“Kemi 85% të degëve funksionale dhe vetëm 15% e degëve të bankave janë dëmtuar. Tashmë thuajse i gjithë sistemi i filialeve funksionon normalisht dhe me orar të plotë”, deklaroi ai.
Kreu i Shoqatës së Bankave shpjegoi se dëmtimi i një filiali nuk nënkupton cenimin e sigurisë së parave të qytetarëve apo të vetë sistemit bankar.
Sipas tij, degët bankare janë kryesisht pika ku qytetarët marrin shërbime, ndërsa infrastruktura që garanton funksionimin dhe sigurinë e bankave është shumë më e gjerë.
“Dëmi në një degë banke është një dëm fizik, pra dëmtim fizik i pronës, por nuk është degë që mban paratë e qytetarëve apo sistemet e tyre”, u shpreh Shella.
Ai sqaroi se sistemi bankar funksionon në disa shtresa dhe infrastruktura kryesore nuk është e përqendruar në degët që ofrojnë shërbime për klientët.
“Dega është vendi ku ne shërbejmë, por e gjithë infrastruktura jonë nuk është te dega. Pra, dëmtimi i degëve bankare thjesht ua vështirëson qytetarëve marrjen e shërbimeve, por nuk cenon bankat në vetvete në aspektin e sigurisë”, theksoi ai.
Deklaratat vijnë pas sulmeve ndaj disa filialeve bankare dhe bankomateve gjatë protestave të ditëve të fundit në kryeqytet.
Mesazhi kryesor i përfaqësuesve të sistemit bankar mbetet se, pavarësisht dëmtimeve materiale, kursimet e qytetarëve dhe funksionimi i infrastrukturës bankare nuk janë cenuar nga sulmet ndaj filialeve. /skyweb.al
