Aktiviteti ndërtimor në fabrikat e armëve në Evropë ka hyrë në një fazë të paprecedentë që prej fillimit të pushtimit të plotë të Ukrainës nga Rusia në vitin 2022.
Një analizë e Financial Times mbi të dhëna satelitore të radarëve, që mbulon 150 objekte prodhimi të 37 kompanive, tregon se këto uzina po zgjerojnë kapacitetet me një ritëm trefish më të shpejtë se ai i kohës së paqes.
Zgjerimet përfshijnë mbi 7 milionë metra katrorë zhvillim të ri industrial, me fokus të veçantë në prodhimin e municioneve dhe raketave, elementë kyç për mbështetjen ushtarake ndaj Ukrainës.
Një pjesë e madhe e kësaj rritjeje po financohet nga programi i Bashkimit Europian “Act in Support of Ammunition Production (ASAP)”, që ka vënë në dispozicion 500 milionë euro për të kapërcyer pengesat në prodhim.
Projekte madhore përfshijnë një fabrikë të re të Rheinmetall në Hungari dhe zgjerime në kompani si MBDA dhe Nammo.
Si rezultat, prodhimi i predhave të artilerisë pritet të rritet nga 300 mijë njësi në vitin 2022 në rreth 2 milionë deri në fund të vitit 2025.
Megjithatë, prodhimi i raketave me rreze të gjatë mbetet i kufizuar dhe kërkon mbështetje të mëtejshme për të përmbushur kërkesën në rritje.
Sipas ekspertëve, ky zgjerim përfaqëson një valë të rearmimit në shkallë historike në kontinentin evropian./skyweb.al
