Konsumi i lartë i sheqerit lidhet më fort me rrezikun për të vdekur nga sëmundjet e zemrës sesa nivelet e kolesterolit, tregon një studim afatgjatë i publikuar në JAMA Internal Medicine.
Analiza 15-vjeçare zbuloi se marrja e 25% ose më shumë të kalorive ditore nga sheqeri i shtuar dyfishon rrezikun e vdekjes nga sëmundjet kardiake krahasuar me ata që konsumojnë më pak se 10%.
Ky efekt u vu re pavarësisht moshës, gjinisë, peshës trupore, aktivitetit fizik apo nivelit të kolesterolit.
Rreziku rritej në mënyrë të vazhdueshme me shtimin e konsumit të sheqerit, edhe tek individët që ndiqnin udhëzimet zyrtare për ushqyerje të shëndetshme.
Burimi kryesor i sheqerit të shtuar janë pijet e ëmbëlsuara me sheqer, të cilat përbëjnë mbi një të tretën e konsumit mesatar amerikan, të ndjekura nga ëmbëlsirat, çokollatat, drithërat e ëmbëlsuara dhe lëngjet e frutave të përpunuara.
Sipas studiuesve, teprica e sheqerit mund të rrisë tensionin e gjakut dhe të nxisë prodhimin e yndyrnave të dëmshme nga mëlçia, të dyja faktorë rreziku për sëmundjet e zemrës.
Shoqata Amerikane e Zemrës rekomandon që gratë të mos konsumojnë më shumë se 6 lugë çaji (rreth 100 kalori) sheqer të shtuar në ditë dhe burrat jo më shumë se 9 lugë çaji (150 kalori).
Megjithatë, një kanaçe e vetme pije të gazuar e arrin ose e tejkalon këtë kufi.
Ekspertët sugjerojnë zëvendësimin e pijeve me sheqer me ujë të gazuar me fruta dhe zgjedhjen e ëmbëlsirave me bazë frutash ose pa sheqer për të ulur rrezikun kardiovaskular./skyweb.al
