Qeveria shqiptare ka shpallur nismën për krijimin e Operatorit Kombëtar të Shpërndarjes së Ujit, një strukturë e re që do të qendërzojë menaxhimin e kompanive të ujësjellësit, duke ndjekur modelin e sektorit të energjisë. Kryeministri Edi Rama e cilësoi këtë hap si fazën e dytë të reformës së nisur në vitin 2021, kur 58 shoqëri u bashkuan në 15 rajonale.
“Një hap i rëndësishëm që do të hedhim së shpejti lidhet me krijimin e Operatorit Kombëtar të Shpërndarjes së Ujit. Sektori i ujit kërkon investime të mëdha dhe administrim të përgjegjshëm. Fragmentimi në 58 ndërmarrje ishte një katastrofë e vërtetë që solli borxhe, paaftësi në menaxhim dhe mungesë investimesh”, deklaroi Rama, duke theksuar se politizimi i burimeve njerëzore e kishte përkeqësuar situatën.
Ai solli shembullin e qytetit të Vlorës, ku ndërhyrja e përkohshme e qeverisë, përmes një ekipi të posaçëm nga Tirana, përmirësoi furnizimin me ujë gjatë sezonit turistik. Sipas tij, kjo dëshmon se problemet lidhen më shumë me administrimin vendor se me mungesën e investimeve.
Kreu i qeverisë nënvizoi se borxhet e ndërmarrjeve të ujësjellësit arritën në 13.6 miliardë lekë në vitin 2020, ndërsa pas bashkimit në 15 shoqëri rajonale, 9 prej tyre nuk krijojnë më detyrime ndaj OSHEE. “Sot kemi rezultate që tregojnë se përgjigjja ndaj sfidës është bashkimi, jo copëzimi”, tha Rama.
Në këtë fazë të dytë, qeveria parashikon një plan masash kundër abuzimeve, që përfshijnë lidhjet e paligjshme, përdorimin e ujit për lavazhe apo derdhjen e tij në rrugë. Objektivi, sipas Ramës, është sigurimi i furnizimit të drejtë për qytetarët që paguajnë, si dhe heqja graduale e depozitave mbi pallate, të cilat janë kthyer në një barrë për banorët.
“Siç bëmë me energjinë, do të ndërhyjmë edhe këtu, nga prodhimi tek shpërndarja, për të ndaluar abuzimet dhe për të garantuar furnizim normal”, përfundoi Kryeministri. /skyweb.al
