Në Tropojë synohet të ndërtohet një nga parqet më të mëdhenj eolikë në Evropë. Ministrja e Infrastrukturës dhe Energjisë, Belinda Balluku deklaroi se projekti është i avancuar, pasi aktualisht është në fazën e marrjes së autorizimeve përkatëse.
“Vendi ynë e ka bazuar prodhimin e energjisë vetëm në burime hidro. Në këto 6 vite kemi arritur të ngrejmë 30% kapacitet prodhuese të vendit, bazuar në një burim të ri energjetik, siç është dielli. Në muajt në vijim po përgatitemi për një nga projektet më të mëdha në Evropë të prodhimit energjetik eolik, për parkun e erës të vendosur në zonën e Tropojës, që ka nisur të gjitha procedurat e autorizimeve, e financuar nga një nga kompanitë më të mëdha amerikane e që do t’i shtojë kurorës tonë energjetike një tjetër komponent të gjelbër”, – tha Balluku në Konferencën e Ambasadorëve.
Ministrja u ndal edhe te investimet infrastrukturore në rrugë, hekurudha dhe porte.
“Projektet e mëdha nuk do kontribuojnë vetëm në ekonominë shqiptare, por rajonale, që kontribuojnë në ndërlidhjen e Ballkanit Perëndimor. Kemi investuar shumë në vitet e fundit në infrastrukturën rrugore, si një nga infrastrukturat parësore dhe të preferuara nga qytetarët shqiptarë, por edhe nga vizitorët e huaj. Në këto 10 vite kemi ndërtuar mbi 1000 km rrugë, mmi 30 km tunele e më shumë 21 km ura, për të ndërlidhur veriun me jugun, lindjen me perëndimit, për të ndërlidhur Shqipërinë me vendet e tjera e për të shkurtuar kohën e udhëtimit maksimalisht”, – tha ajo. / Skyweb.al
