Shumica dërrmuese e emigrantëve shqiptarë vijojnë të jenë të përqendruar në tre vende, Itali, Greqi dhe Shtetet e Bashkuara të Amerikës. Sipas të dhënave të raportuara nga misionet diplomatike dhe konsullore, vetëm në Itali janë të regjistruar mbi 389 mijë shqiptarë, çka e rendit këtë vend në krye të listës.
Në Greqi numri i shqiptarëve arrin mbi 264 mijë, ndërsa në SHBA jetojnë rreth 224 mijë shqiptarë. Këto shifra tregojnë se 35% e emigrantëve shqiptarë janë në Itali, 24% në Greqi dhe 20% në SHBA, kryesisht të përqendruar në metropole si Athina, Selaniku, Roma dhe Milano, shkruan Skyweb.al
Edhe Gjermania dhe Mbretëria e Bashkuar mbeten destinacione të rëndësishme të emigracionit. Aktualisht, mbi 119 mijë shqiptarë jetojnë në Gjermani dhe rreth 100 mijë në Britani.
Por dinamika e viteve të fundit tregon një ndryshim të dukshëm. Referuar Profilit Vjetor të Migracionit 2024, Italia dhe Greqia, dikur destinacionet kryesore për shqiptarët po humbasin terren si zgjedhje për brezin e ri të emigrantëve. Arsyeja lidhet me sfidat ekonomike dhe sociale në këto vende, ndërsa Gjermania dhe shtetet e Evropës Qendrore e Veriore po bëhen më tërheqëse për shkak të tregut të punës më të favorshëm, politikave më të hapura migratore dhe integrimit më të lehtë.
Motivet ekonomike mbeten shtysa kryesore e emigracionit shqiptar, duke u ndërlidhur me papunësinë, varfërinë, por edhe faktorë të tjerë si shërbimet shëndetësore, mundësitë profesionale dhe bashkimi familjar. Italia dhe Greqia kanë qenë historikisht më të preferuarat për shkak të afërsisë gjeografike, kostos më të ulët të lëvizjes dhe mundësive ligjore për emigrantët. /Skyweb.al
