Çmimet e ushqimeve dhe qirave vijojnë të rriten në Shqipëri, duke ndikuar drejtpërdrejt në buxhetin e familjeve. Sipas të dhënave zyrtare të INSTAT, indeksi i çmimeve të konsumit në gusht 2025 shënoi rritje vjetore me 2,3%, krahasuar me të njëjtin muaj të vitit të kaluar. Një vit më parë ky tregues ishte 2,0%.
Krahasuar me korrikun, çmimet u rritën me 0,3%.
Të dhënat tregojnë se rritja më e madhe u regjistrua tek grupi “Ushqime dhe pije joalkoolike”, i cili kontribuoi me +0,85 pikë përqindje në rritjen totale. Ky grup mbetet edhe më i ndjeshmi për konsumatorët, pasi përbën pjesën kryesore të shpenzimeve mujore.
Pas ushqimeve, një tjetër grup që ka rënduar ndjeshëm familjet është “Qira, ujë, lëndë djegëse dhe energji”, me ndikim +0,63 pikë përqindje. Ky tregues pasqyron rritjen e qirave dhe kostove të jetesës, të cilat po ndihen fort në qytetet e mëdha.
Rritje më të vogla janë shënuar edhe tek mobiljet dhe pajisjet e shtëpisë, pijet alkoolike e duhani, argëtimi dhe kultura, si edhe shpenzimet në hotele, kafene dhe restorante.
Sipas INSTAT, ndikim minimal në rritjen e çmimeve kanë dhënë transporti, komunikimi, veshjet, arsimi dhe shëndetësia, por tendenca e përgjithshme mbetet drejt shtrenjtimit. /skyweb.al
