Drejtoria e Përgjithshme e Shërbimeve të Transportit Rrugor (DPSHTRR) njofton se gjatë periudhës janar–shtator 2025 janë regjistruar në Shqipëri 74.073 automjete të reja. Krahasuar me të njëjtën periudhë të vitit 2019, kjo përfaqëson një rritje të ndjeshme prej 101%.
Sipas DPSHTRR-së, pjesa më e madhe e këtyre mjeteve, plot 81.8% ose 60.568 njësi, janë automjete të përdorura, por jo shumë të vjetra. Ligji shqiptar nuk lejon më importin e mjeteve më të vjetra se 15 deri në 20 vjet, në varësi të vendit të origjinës.
Një tjetër tregues domethënës është rritja e importit të makinave të gjeneratës së fundit. Gjatë këtyre 9 muajve, janë regjistruar 14.724 automjete të reja (0 deri në 4 vjeç), shifër që tregon një rritje prej 8% krahasuar me vitin 2024. Kjo tendencë tregon orientimin e tregut drejt mjeteve më moderne, më të sigurta dhe më efikase në konsum.
Në krye të listës së vendeve eksportuese të automjeteve drejt Shqipërisë qëndron Koreja e Jugut, me 20.9% të totalit të importit. Çmimet konkurruese dhe hapja e tregut kanë ndikuar që shumë qytetarë shqiptarë të zgjedhin markat koreane. Pas saj renditen Italia (15.7%), Gjermania (15.6%), Zvicra dhe Kina (të dyja me 8.5%) dhe SHBA me 8.1%.
Paralelisht me rritjen e regjistrimeve, është shënuar dhe një numër i konsiderueshëm çregjistrimesh përfundimtare të mjeteve të vjetra. Gjatë periudhës janar–shtator 2025, janë çregjistruar përfundimisht 6.128 automjete, një rritje prej 18.4% krahasuar me një vit më parë.
Sipas DPSHTRR-së, ky proces ndihmon në përmirësimin e sigurisë rrugore dhe në reduktimin e ndotjes mjedisore, duke kontribuar në krijimin e një flote automjetesh më moderne dhe më miqësore me mjedisin, një hap i rëndësishëm drejt së ardhmes së automotorizimit në Shqipëri. /Skyweb.al
