Prej kësaj të premteje, më 1 maj, Shqipëria dhe Kosova kanë rikthyer zyrtarisht regjimin e kalimit pa kontrolle kufitare për automjetet me targa të të dyja vendeve. Kjo masë do të jetë në fuqi deri më 30 shtator dhe synon të lehtësojë ndjeshëm lëvizjen gjatë sezonit veror, kur numri i udhëtarëve rritet ndjeshëm.
Sipas marrëveshjes, automjetet me targa shqiptare dhe kosovare do të kalojnë në pikat kufitare pa ndalesa dhe pa procedurat e zakonshme të kontrollit. Ndërkohë, mjetet me targa të huaja do t’i nënshtrohen vetëm kontrolleve të shpejta, për të shmangur vonesat dhe radhët e gjata, veçanërisht në pikën kufitare Morinë–Vërmicë.
Ky lehtësim vjen pas një ndërprerjeje dy-mujore, pasi gjatë marsit dhe prillit u rikthyen kontrollet e plota. Megjithatë, edhe gjatë kësaj periudhe, në fundjavë dhe në ditë festash u aplikua një regjim i thjeshtuar për qytetarët e dy vendeve.
Ky model bashkëpunimi mes Shqipërisë dhe Kosovës ka dhënë rezultate pozitive ndër vite, sidomos gjatë verës, duke nxitur turizmin, vizitat familjare dhe shkëmbimet tregtare.
Sipas të dhënave zyrtare, vetëm në orët e para të së premtes kanë hyrë në Shqipëri rreth 20 mijë qytetarë, shumica prej tyre nga Kosova./Skyweb.al
