Rritja e çmimeve të ushqimeve ka përshpejtuar inflacionin në Shqipëri, i cili në korrik 2025 arriti në 2,5 për qind, niveli më i lartë që nga shkurti i vitit të kaluar. Të dhënat zyrtare të INSTAT tregojnë se një vit më parë inflacioni ishte 2,1 për qind, ndërsa krahasuar me qershorin, çmimet shënuan një rënie të lehtë prej 0,1 për qind.
Grupi “Ushqime dhe pije joalkoolike” ka pasur ndikimin më të madh në rritjen e përgjithshme të çmimeve, duke kontribuar me +1,08 pikë përqindje. Brenda këtij grupi, rritjet më të larta janë shënuar te “vajrat dhe yndyrnat” me 6,7 për qind, “zarzavatet përfshirë patatet” me 5,4 për qind, “qumështi, djathi dhe vezët” me 3,8 për qind dhe “mishi” me 3,5 për qind.
Pas ushqimeve, ndikim të lartë kanë pasur edhe “Qira, ujë, lëndë djegëse dhe energji” me +0,61 pikë përqindje, ndërsa rritje kanë regjistruar edhe grupet “Pije alkoolike dhe duhan”, “Argëtim dhe kulturë”, “Hotele, kafene dhe restorante” dhe “Mobilje, pajisje shtëpie”. Nga ana tjetër, grupi “Transporti” ka qenë i vetmi që ka shënuar ulje vjetore të çmimeve, me 0,4 për qind.
Ekspertët paralajmërojnë se trendi i shtrenjtimit të ushqimeve mund të vazhdojë në muajt në vijim, duke ushtruar presion mbi buxhetet familjare dhe duke ndikuar drejtpërdrejt në koston e jetesës./skyweb.al
