Korniza ligjore që rregullon blerjen e paketave kontrolluese në kompanitë e listuara në bursë pritet të pësojë ndryshime të rëndësishme, në një përpjekje për të rritur standardet e transparencës dhe mbrojtjes së investitorëve në tregun shqiptar të kapitalit.
Qeveria ka hedhur në konsultim një paketë amendimesh që prekin mënyrën se si realizohen ofertat për marrjen nën kontroll të shoqërive me aksione publike. Synimi kryesor i ndërhyrjes ligjore është krijimi i një procesi më të qartë dhe më të barabartë për të gjithë aksionarët, veçanërisht për ata që zotërojnë pjesë të vogla kapitali.
Në fokus të ndryshimeve është mekanizmi i çmimit në ofertat publike. Drafti parashikon që nëse një blerës paguan një vlerë më të lartë për aksione të veçanta gjatë periudhës së ofertës, i njëjti çmim duhet të aplikohet automatikisht për të gjithë aksionarët që pranojnë ofertën. Ky parim synon të eliminojë trajtimet preferenciale dhe të garantojë barazi në pagesë.
Projektligji rrit gjithashtu rolin mbikëqyrës të Autoriteti i Mbikëqyrjes Financiare, duke i dhënë këtij institucioni kompetenca më të gjera për të ndërhyrë në situata ku evidentohen devijime në treg, tentativa për ndikim artificial të çmimeve apo rrethana të jashtëzakonshme që mund të cenojnë interesat e investitorëve. Vendimmarrjet e AMF do të duhet të jenë të arsyetuara dhe të bëhen publike.
Ndryshime parashikohen edhe në mënyrën e ushtrimit të të drejtave të votës gjatë periudhës së ofertës për kontroll. Në raste të caktuara, kufizimet mbi votimin mund të pezullohen, ndërsa aksionet me të drejta të shumëfishta do të trajtohen sipas një logjike që synon balancimin e ndikimit në vendimmarrje.
Paketa ligjore synon gjithashtu harmonizimin gradual me kuadrin rregullator të Bashkimit Evropian për ofertat publike të marrjes në kontroll, duke krijuar bazën për integrimin e tregut shqiptar të kapitalit në standardet evropiane. Disa dispozita janë parashikuar të zbatohen vetëm pas anëtarësimit të vendit në BE.
Në tërësi, ndryshimet synojnë të forcojnë besimin e investitorëve, të rrisin sigurinë juridike në transaksionet e mëdha dhe të krijojnë një mjedis më të parashikueshëm për zhvillimin e tregut financiar në vend. /skyweb.al
