Pas njoftimit të rrjetit italian të supermarketeve Conad për tërheqjen me urgjencë të dy loteve të produktit Mortadella Bologna IGP për shkak të një moskonformiteti mikrobiologjik, duke dyshuar për elementë të listerisë në të, është konfirmuar se këto lote nuk kanë hyrë në tregun shqiptar.
Sipas lajmit të publikuar më herët nga Skyweb.al, Conad Italia kishte njoftuar për tërheqjen parandaluese të paketimit 100 gramë Mortadella Bologna IGP Conad Freschi & Convenienti, të prodhuar nga kompania Salumifici Granterre Spa në fabrikën e saj në Noceto, Parma.
Bëhej fjalë për lotet:
26535005, me datë skadence 13 tetor 2025
26535020, me datë skadence 14 tetor 2025
Sipas njoftimit, konsumatorëve në Itali që kishin blerë produkte nga këto lote u kërkua t’i kthenin në pikat e shitjes për zëvendësim ose rimbursim.
Në vijim, redaksia e skyweb.al kontaktoi me përfaqësinë e Conad Albania për të mësuar nëse të njëjtat lote ishin importuar edhe në vendin tonë.
Sot, kompania dha një përgjigje zyrtare duke theksuar se pas verifikimeve të kryera, lotet e përmendura nuk janë sjellë në tregun shqiptar.
“Pas njoftimit të marrë nga Conad Italia, Conad Albania kreu menjëherë verifikimet dhe konfirmon me përgjegjësi të plotë se dy lotet në fjalë nuk janë importuar në tregun shqiptar”, thuhet në deklaratën e Conad Albania.
Kompania shtoi se falë komunikimit të drejtpërdrejtë me grupin Conad në Itali, çdo njoftim që lidhet me sigurinë ushqimore shpërndahet menjëherë brenda sistemit, duke garantuar masat parandaluese dhe mbrojtjen e konsumatorëve shqiptarë. /skyweb.al
