Inspektoriati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) ka gjobitur me 3 mijë euro ish-ministren e Bujqësisë, Frida Krifca. Vendimi është publikuar në faqen zyrtare të Gjykatës Administrative të Tiranës, ku kërkohet edhe ekzekutimi i gjobës.
Sipas të dhënave zyrtare, gjoba është vendosur më 12 qershor 2025, për shkelje të ligjit mbi parandalimin e konfliktit të interesit. Megjithatë, njoftimi nuk sqaron rastin konkret për të cilin është penalizuar Krifca, e cila aktualisht punon si këshilltare në Kryeministri.
Ndërkohë, opozita ka akuzuar në mënyrë të përsëritur ish-ministren si përfituese indirekte të fondeve publike përmes kompanisë së bashkëshortit të saj, Erti Lutaj. Sipas një denoncimi të Partisë Demokratike, kompania “Lucom Projects” e Lutajt ka përfituar mbi 120 mijë euro nga kontratat me Bashkinë e Tiranës. Nuk është e qartë nëse këto akuza kanë lidhje të drejtpërdrejtë me gjobën e vendosur nga ILDKPKI.
Frida Krifca u largua nga posti i ministres së Bujqësisë pas shpërthimit të skandalit me fondet IPARD të Bashkimit Europian, të dedikuara për zhvillimin rural në Shqipëri. Komisioni Europian ndërpreu disbursimin e granteve për vendin tonë, duke konstatuar korrupsion dhe parregullsi të theksuara në menaxhimin e tyre, periudhë gjatë së cilës Krifca drejtonte Agjencinë për Zhvillim Bujqësor dhe Rural (AZHBR)./ skyweb.al
