Gjermania do të investojë 35 miliardë euro deri në vitin 2030 në projekte të lidhura me mbrojtjen hapësinore, për të rritur pavarësinë teknologjike dhe për të mbrojtur asetet e saj në orbitë, në kushtet kur hapësira po kthehet gjithnjë e më shumë në një fushë garash ushtarake.
Lajmin e bëri të ditur ministri i Mbrojtjes Boris Pistorius gjatë fjalës së tij në Kongresin e tretë të Industrisë Hapësinore, zhvilluar në Berlin.
“Rrjetet satelitore janë thembra e Akilit e shoqërive moderne. Kushdo që i sulmon, paralizon kombe të tëra,” tha Pistorius, duke kujtuar sulmin kibernetik rus ndaj rrjetit satelitor ViaSat, pak para pushtimit të Ukrainës, i cili ndikoi edhe tek funksionimi i rreth 6 mijë turbinave të erës në Gjermani.
Pistorius bëri të ditur ndërtimin e një arkitekture të plotë për sigurinë hapësinore ushtarake, që do të përfshijë sisteme më rezistente ndaj sulmeve, radarë dhe teleskopë për mbikëqyrjen e orbitës, satelitë “roje” dhe një qendër të re operacionale për satelitët ushtarakë, nën komandën hapësinore të Bundeswehrit, e krijuar në vitin 2021.
Ai theksoi se Rusia dhe Kina janë kundërshtarë të mundshëm në hapësirë, duke përmendur faktin se dy satelitë rusë Luch-Olymp po ndjekin nga afër satelitë të kompanisë Intelsat që përdoren nga ushtria gjermane.
“Sjellja e Rusisë, sidomos në hapësirë, përbën një kërcënim serioz për të gjithë ne. Është një kërcënim që nuk mund ta injorojmë më,” tha ai.
Një ndryshim i dukshëm në politikën gjermane lidhet me faktin që Pistorius pranoi se vendi duhet të mendojë edhe për aftësi ofensive në hapësirë, për të pasur një parandalim të besueshëm. Kjo përbën një largim nga politika e deritanishme e Berlinit, e cila ka qenë vetëm mbrojtëse. “Duhet të jemi në gjendje të parandalojmë edhe në hapësirë, që të jemi të mbrojtur,” deklaroi ai.
Ky vendim vjen në një kohë kur Gjermania ka rritur ndjeshëm buxhetin ushtarak. Me shtesat e fundit, vendi renditet i katërti në botë për shpenzime mbrojtjeje, pas Shteteve të Bashkuara, Kinës dhe Rusisë.
Me këtë investim gjigant në fushën hapësinore, Berlini jo vetëm që synon të mbrojë interesat e tij strategjikë, por edhe të tregojë se është i gatshëm të përballet me sfidat e reja të sigurisë globale. /skyweb.al
