Shqipëria ka hedhur një tjetër hap drejt forcimit të sigurisë energjetike, duke nënshkruar memorandumin për zhvillimin e hub-it energjetik të Vlorës dhe marrëveshjen kuadër për furnizimin me gaz të lëngshëm natyror.
Nënshkrimi u bë në prani të Kryeministrit Edi Rama, ambasadores së SHBA-së në Greqi, Kimberly Guilfoyle dhe të ngarkuarës me punë të SHBA-së në Tiranë, Nancy VanHorn, duke theksuar bashkëpunimin e ngushtë me Shtetet e Bashkuara dhe koordinimin me Greqinë në sektorin energjetik. Marrëveshja për palën shqiptare u nënshkrua nga Drejtoresha e Albgaz, Amarda Kapaj.
Sipas Ministrisë së Infrastrukturës dhe Energjisë, projekti synon ta pozicionojë Shqipërinë si një portë strategjike energjetike për rajonin, duke rritur sigurinë e furnizimit dhe duke diversifikuar burimet e energjisë.
Hub-i energjetik i Vlorës parashikohet të luajë një rol kyç në integrimin e tregut shqiptar me atë rajonal dhe ndërkombëtar, duke krijuar kushte për zhvillimin e mëtejshëm të infrastrukturës së gazit dhe rritjen e kapaciteteve energjetike.
Autoritetet theksojnë se ky është një hap konkret drejt objektivit që brenda vitit 2030 Shqipëria të kthehet në një vend eksportues neto të energjisë, duke u mbështetur në investime strategjike dhe partneritete ndërkombëtare. /skyweb.al
