Zonat e mbrojtura në qarkun e Shkodrës kanë shënuar një tjetër vit me rritje të ndjeshme të vizitorëve, duke u kthyer në një prej destinacioneve më të preferuara të turizmit natyror në Shqipëri.
Sipas të dhënave nga Administrata e Zonave të Mbrojtura (ADZM) Shkodër, gjatë periudhës janar-gusht 2025, rreth 920,855 turistë kanë vizituar këto zona, nga të cilët 550,010 ishin vendas dhe 370,845 të huaj.
Parku Kombëtar i Alpeve mbetet më i vizituari, me 378,890 turistë, mes tyre 216,290 vendas dhe 162,600 të huaj, që kanë eksploruar bukuritë natyrore të Thethit, Valbonës, Vermoshit, Bogës dhe luginës së Gashit.
Një nga risitë më tërheqëse është zipline-a në Theth, që ofron një pamje unike nga ajri mbi peizazhet malore dhe ka zgjeruar mundësitë e eksplorimit për vizitorët.
Shkodra, me një sipërfaqe të konsiderueshme të zonave të mbrojtura, po forcon gjithnjë e më shumë pozicionin e saj si një prej qendrave më të rëndësishme për turizmin e natyrës, kulturës dhe aventurës në Shqipëri. /Skyweb.al
