Sipas Financial Times, kërkesa e furishme për argjend në tregun e Londrës ka ndezur një garë mes investitorëve dhe industrisë, duke bërë që metali i bardhë të performojë më mirë edhe se ari, i cili vetë ka arritur një rekord të ri prej 4,179 dollarësh për onz, me rritje vjetore prej 59%.
Rritja e çmimit po nxitet nga disa faktorë: kërkesa e fortë industriale nga sektori i elektronikës dhe paneleve diellore, grumbullimet nga investitorët që e shohin argjendin si “zëvendësues” të arit, si dhe blerjet masive në Indi në prag të sezonit të dasmave.
Në Londër, rezervat e argjendit kanë rënë në nivele historikisht të ulëta, duke krijuar një prim prej 1 deri në 2 dollarë mbi çmimin e kontratave të së ardhmes në bursën COMEX të Nju Jorkut.
Për shkak të mungesës, disa tregtarë kanë ndërmarrë një hap të pazakontë: transportimin e sasisë fizike të argjendit me avion nga Nju Jorku drejt Londrës, praktikë e rezervuar zakonisht për arin, pasi argjendi është më voluminoz dhe zakonisht dërgohet me anije.
Ky tension në treg ka çuar çmimet përtej edhe të famshmes “krizë e argjendit” të viteve 1980, e njohur si spekulimi i vëllezërve Hunt. Tregtarët e përshkruajnë sot situatën si “arin në version steroide”, pasi luhatjet e çmimit të argjendit janë shumë më të forta në periudha të pasigurisë globale.
Ndryshe nga ari, i cili mbahet në rezerva nga bankat qendrore dhe mund të stabilizohet nga ndërhyrjet e tyre, argjendi nuk ka një shitës të fundit në rast mungese likuiditeti.
Shtetet e Bashkuara po shqyrtojnë aplikimin e tarifave doganore mbi importet e argjendit, çka ka bllokuar një pjesë të konsiderueshme të rezervave fizike në Nju Jork, duke thelluar krizën e ofertës në tregun londinez.
Prodhimi i argjendit mbetet i kufizuar, pasi nxirret kryesisht si nënprodukt i minierave të plumbit, zinkut dhe arit. Kjo varësi e lartë nga prodhimi dytësor po e bën edhe më të vështirë balancimin e tregut, ndërsa çmimi i metalit të bardhë vijon të ngjitet në nivele të paprecedenta. /skyweb.al
