Përshkallëzimi i luftës në Iran dhe rikthimi i tensioneve në Lindjen e Mesme janë pasqyruar me një rritje të menjëhershme të çmimeve të karburanteve në tregun shqiptar. Në shumicën e pikave të tregtimit, një litër naftë shitet aktualisht me 206 lekë.
Ky është çmimi më i lartë i naftës në vend që prej mesit të muajit maj, kur ishte ulur nën nivelin e 200 lekëve për litër. Edhe benzina ka pësuar shtrenjtim, duke arritur në rreth 189 lekë për litër, një nga nivelet më të larta të javëve të fundit.
Rritja në Shqipëri vjen paralelisht me shtrenjtimin e naftës së papërpunuar në tregjet ndërkombëtare, ku frika për ndërprerjen e furnizimeve është shtuar ndjeshëm.
Forcat amerikane kanë vijuar goditjet ndaj objektivave ushtarake iraniane, ndërsa tensionet kanë prekur edhe rrugët kryesore të transportit të naftës.
Cisternat janë detyruar të ndryshojnë drejtim në Detin e Kuq pas paralajmërimeve të milicisë Huthi, të mbështetur nga Irani.
Nafta Brent u rrit me rreth 2%, duke arritur në 92.85 dollarë për fuçi, niveli më i lartë në gjashtë javët e fundit.
Edhe nafta amerikane West Texas Intermediate u rrit me 2%, në 86.01 dollarë për fuçi. Për momentin nuk dihet se ku do të ndalet shtrenjtimi. Nëse luftimet vazhdojnë dhe furnizimi ndërkombëtar vihet më tej në rrezik, presioni mbi çmimet në Shqipëri pritet të mbetet i lartë. Rritja e naftës pritet të ndikojë jo vetëm te drejtuesit e automjeteve, por edhe te kostot e transportit, mallrave dhe produkteve të tjera që varen nga karburantet. /skyweb.al
