Dhjetë anëtarë të Këshillit Drejtues Sindikal të kompanisë “Bankers Petroleum” në Fier kanë nisur sot një grevë urie pa afat, rreth orës 10:00 të paradites.
Grevistët deklaruan se janë të vendosur ta çojnë deri në fund kauzën e tyre, ndërsa gjatë ditëve në vijim pritet që t’u bashkohen edhe punonjës të tjerë të kompanisë.
Greva organizohet nga Sindikata e Sektorit të Hidrokarbureve dhe pason një sërë protestash të zhvilluara më parë për rritje pagash dhe përmirësim të kushteve të punës.
Sipas sindikatës, punonjësit kërkojnë që “Bankers” të rrisë me 18 për qind buxhetin vjetor të pagave, duke e çuar pagën mesatare nga 60 mijë lekë në 100 mijë lekë në muaj.
Nga ora 07:00 e mëngjesit të nesërm, do të ndërpritet puna në terren, çka pritet t’i shkaktojë kompanisë dëme të konsiderueshme ekonomike.
Kjo është protesta e katërt e organizuar nga Sindikata e Bankers gjatë vitit 2025, ndërsa kërkesave të naftëtarëve nuk u është dhënë ende asnjë përgjigje nga drejtuesit e kompanisë.
Vendimi për grevën e urisë u mor pas dështimit të negociatave të përsëritura dhe mungesës së dialogut nga ana e menaxhmentit të kompanisë.
Protesta e naftëtarëve në Marinëz të Fierit zhvillohet në një moment kur kompania “Bankers Petroleum” është gjithashtu nën hetim nga SPAK, për çështje që lidhen me aktivitetin dhe menaxhimin financiar të saj. /skyweb.al
