Prokuroria e Përgjithshme ka hapur një tender me vlerë 660 mijë euro për një kontratë që përfshin mirëmbajtjen, rinovimin me pajisje, instalimin dhe implementimin e sistemit të përgjimit për një periudhë trevjeçare. Sipas dokumenteve zyrtare të publikuara në sistemin e prokurimeve publike, fondi do të financohet nga Buxheti i Shtetit.
Çka bie në sy në këtë procedurë është mënyra e zhvillimit të saj: “Me negocim pa shpallje paraprake të njoftimit të kontratës” – një formë e mbyllur e prokurimit që nënkupton se nuk ka pasur një thirrje të hapur për konkurrim. Në vend të kësaj, autoriteti kontraktor ka ftuar drejtpërdrejt kandidatët e përzgjedhur, të cilët do të duhet të dorëzojnë dokumentacionin brenda afateve të caktuara.
Dokumentet e tenderit parashikojnë që kandidaturat do të shqyrtohen në bazë të kritereve të përcaktuara në dokumentacionin teknik, por nuk është bërë e ditur numri apo identiteti i operatorëve të ftuar.
Kontrata do të ketë një kohëzgjatje trevjeçare, duke e bërë këtë një ndër tenderët më afatgjatë dhe më strategjikë në fushën e IT dhe sigurisë për organin e akuzës./skyweb.al
